لاہور (نمائندہ سپورٹس+سپورٹس رپورٹر)انڈر نائنٹین ورلڈکپ میں تیسری پوزیشن کے لیے آج ( جمعرات کو ) پاکستان اور افغانستان کے درمیان میچ پڑے گا، کیویز کے دیس میں جاری جونیئرز کا سپر میگا ایونٹ اختتامی مراحل میں داخل ہوچکا ہے۔ کوئنز ٹان میں ایک اور بڑا میدان لگے گا ، پاکستان اور افغانستان مدمقابل ہوں گے۔ فائنل کی دوڑ سے باہر ہونے والی دونوں ٹیمیں تیسری پوزیشن کے لیے جان لڑائیں گی۔میچ پاکستانی وقت کے مطابق آج رات ڈھائی بجے شروع ہو گا۔ قومی ٹیم کے کھلاڑیوں اور آفیشلز نے عزم کا اظہار کیا ہے کہ تمام خامیاں اور ناکامیاں بھلا کر میدان میں اتریں گے۔ یاد رہے کہ گذشتہ سال ایشیا کپ انڈر نائنٹین کے فیصلہ کن مقابلے میں پاکستانی جونیئر افغانستان سے ہی ہار چکے ہیں۔ انڈر نائنٹین ورلڈکپ کا فائنل تین فروری کو بھارت اور آسٹریلیا کے درمیان شیڈول ہے۔نیوزی لینڈ میں جاری انڈر19کرکٹ ورلڈ کپ میں جنوبی افریقہ نے بنگلہ دیش کو شکست دے کر ایونٹ میں پانچویں پوزیشن حاصل کرلی ۔ بنگلہ دیش کی ٹیم پہلے کھیلتے ہوئے 178رنز پر پویلین لوٹ گئی ۔ جنوبی افریقہ نے ہدف دو وکٹوں کے نقصان پرپورا کرلیا ۔