راولپنڈی (صباح نیوز+ آئی این پی+ آن لائن) راولپنڈی کے علاقے کلیال میں حساس ادارے اور پولیس نے مشترکہ کامیاب کارروائی کرتے ہوئے بڑی تعداد میں ملک دشمن لٹریچر اور ہتھیار برآمد کرلیا۔گزشتہ روز راولپنڈی کے ملحقہ علاقہ کلیال میں آپریشن ردالفساد کے تحت حساس ادارے اور پولیس کی جانب سے مشترکہ کارروائی کی گئی۔ آپریشن کے دوران بڑی تعداد میں ملک دشمن جہادی لٹریچر، لیپ ٹاپ، موبائل فونز اور ہتھیار برآمد کرلئے گئے۔ پولیس اور حساس ادارے کی جانب سے علاقے کو گھیرے میں لے کرکارروائی کا آغاز کردیا گیا جبکہ مختلف علاقوں میں چھاپے بھی مارے جارہے ہیں۔ دریں اثناء سکیورٹی فورسز نے اسلام آباد کے نواحی گائوں ڈورے میں سرچ آپریشن کر کے 7 مشتبہ افراد کو حراست میں لے لیا۔ ملزمان کے قبضے سے 6 کلو چرس اور 100 گرام ہیروئن برآمد کی گئی۔ مزید تفتیش کیلئے زیر حراست افراد کو تھانہ ترنول منتقل کر دیا گیا۔