لاہور (خصوصی رپورٹر) وزیراعلیٰ شہباز شریف نے ملتان کا 5 گھنٹے طویل نان سٹاپ دورہ کیا، وزیراعلیٰ ملتان انسٹی ٹیوٹ آف کڈنی ڈیزیز میں تقریب میں بہت خوش نظر آرہے تھے اور انہوں نے اپنی اس خوشی کا اظہار سرائیکی زبان میں کیا۔ انہوں نے کہا کہ ’’میڈے دل کوں اج بہوں خوشی تھئی اے۔ اج میکوں بہوں دعاواں ملسن۔ کڈنی سنٹر وچ مریضاں کو فری کھانا ڈِتا ویندے‘‘۔ وزیراعلیٰ نے اپنی تقریر میں سندھی زبان کا لفظ ’’سٹھو مانو‘‘ بھی استعمال کیا۔ شہباز شریف اجتماع سے خطاب کرنے آئے تو عوام نے پرجوش انداز میں ان کا استقبال کیا اور پنڈال’’ وزیر اعظم شہباز شریف ‘‘ کے نعروں سے گونجتا رہا۔کارکن بار بار ’’شہباز شریف وزیر اعظم‘‘ کے نعرے لگاتے رہے۔ وزیر اعلیٰ کے خطاب کے دوران ’’ شیر آیا شیر آیا‘‘ کے نعرے بھی لگائے گئے۔ وزیر اعلیٰ نے کہا کہ میں جلد ملتان میں سیاسی جلسہ کروں گا جس میں کھل کر سیاسی باتیں ہوں گی‘وزیر اعلیٰ نے اپنی تقریرکے اختتام پر ’’پاکستان زندہ باد، قائد اعظم زندہ باد اور نواز شریف زندہ باد‘‘ کے نعرے لگائے۔