سرائے عالمگیر+ راجووال+ حجرہ شاہ مقیم+ اختر آباد+ اوکاڑہ (نامہ نگاران) ٹریفک حادثات میں خاتون اور بچی سمیت 6 افراد جاں بحق ہو گئے۔ سرائے عالمگیر میں کار اور ٹرالر کی ٹکر کی زد میں آ کر موٹر سائیکل سوار بیوی اور بیٹی جاں بحق ہو گیا۔ کھاریاں سے آنے والی کار بے قابو ہو کر دوسرے ٹریک پر چلی گئی اور راولپنڈی سے آنے والے ٹرالر سے ٹکرا گئی۔ اسی دوران خرم شاہ بیوی اور اڑھائی سالہ بیٹی پاکیزہ کے ہمراہ جاتے ہوئے دونوں گاڑیوں کے درمیان آنے سے کچلا گیا جس کے نتیجے میں باپ، بیٹی موقع پر دم توڑ گئے جبکہ خاتون کو شدید زخمی حالت میں ضلعی ہسپتال پہنچایا گیا جہاں وہ زخموں کی تاب نہ لاتے ہوئے دم توڑ گئی۔ دریں اثنا راجووال کے قریب دیپالپور قصور روڈ پر تیز رفتار کار گنے کے ٹرالے کے ساتھ ٹکرا گئی جس کے نتیجے میں 3 افراد موقع پر جاں بحق جبکہ دو زخمیوں کو تشویش ناک حالت میں لاہور ہسپتال پہنچا دیا گیا۔ شیخوپورہ کے رہائشی 5افراد کار میں پاکپتن جا رہے تھے کہ راجووال کے قریب دیپالپور قصور روڈ پر کھڑے گنے کے ٹرالے کے ساتھ ٹکرا گئی جس کے نتیجے میں 3افراد موقع پر جاںبحق جبکہ دو شدید زخمی ہو گئے جاں بحق ہو نے والوں میں ساجد علی، قبیل لیاقت، محمد اعظم ساکنان شیخوپورہ شامل ہیں۔ زخمیوں میں محمد افضل اور کامران کو تشویش ناک حالت میں لاہور ریفر کر دیا گیا۔ واضح رہے کہ اسی سڑک پر یہ دسواں حادثہ ہے جس میں اب تک 6سے زائد افراد جان سے ہاتھ دھو بیٹھے ہیں لیکن قریبی پٹرولنگ پوسٹ کے اہلکار اپنا کو ئی کردار ادا نہیں کر رہے۔ دوسری جانب عبداللہ شوگر ملز کی طرف سے کسانوں سے گنا خریدنا بند کر دیا گیا جس کی وجہ سے سینکڑوں گنے سے بھرے ٹرالے مین روڈ پر کھڑے ہیں جس وجہ سے آئے روز حادثات ہو رہے ہیں ۔