اسلام آباد + خیبر ایجنسی (خصوصی نمائندہ + صباح نیوز) ملک کے مختلف حصوں میں انسداد پولیو مہم (آج ) پیر سے شروع ہو گی۔ پنجاب میں پانچ روزہ انسداد پولیو مہم کے دوران پانچ سال تک عمرکے ایک کروڑ پچاسی لاکھ بچوں کو پولیو سے بچائو کے قطرے پلائے جائیں گے۔ خیبر پی کے میں تین روزہ انسداد پولیو مہم کے دوران تمام اضلاع میں پانچ سال تک کی عمر کے ستاون لاکھ سے زائد بچوں کو پولیوسے بچائو کے قطرے پلائیں جائیں گے۔ ادھر سندھ میں سال کی دوسری سات روزہ انسداد پولیو مہم اس ماہ کی انیس تاریخ کو شروع ہوگی جس میں کراچی کی 188 یونین کونسلوں میں پانچ سال سے کم عمر کے دو لاکھ اٹھائیس ہزار بچوں کو پولیو سے بچائو کے قطرے پلائے جائیںگے۔ پولیو سے بچائو کے قطرے پلانے والی ٹیموں کے تحفظ کیلئے پولیس اور رینجرز کی تعیناتی کے خصوصی انتظامات کئے گئے۔ صباح نیوز کے مطابق سال 2018ء کی دوسری انسداد پولیو مہم فاٹا میں آج پیر سے شروع ہو گی۔ تین روزہ انسداد پولیو مہم 12 فروری سے 14 فروری تک جاری رہے گی، جس کے بعد رہ جانے والے بچوں کو پولیو قطرے پلوانے اور سرویلنس کا کام جاری رکھا جائے گا۔ مہم کے دوران 5 سال سے کم عمر کے کل 1005774 بچوں کو 4368 ٹیموں کی مدد سے پولیو قطرے پلوائے جائیں گے، جس میں 3987 موبائل ٹیمیں، 276 فکسڈ ٹیمیں اور 105 ٹرانزٹ ٹیمیں شامل ہیں۔