کراچی (کرائم رپورٹر) مختلف علاقوں میں تشدد اور فائرنگ کے واقعات میں پرائیویٹ سکیورٹی گارڈ سمیت چار افراد ہلاک اور ایک شخص زخمی ہوگیا۔ بلوچ کالونی کے علاقے کراچی ایڈمنسٹریشن سوسائٹی میں وی ایس پی جنرل سٹور پر تعینات سکیورٹی گارڈ سٹور میں ڈکیتی کی کوشش کرنے والے مسلح ملزمان نے فائرنگ کرکے ہلاک کیا جو فرار ہونے میں کامیاب ہوگئے۔ ادھر شاہ فیصل کالونی کے علاقے ناتھا خان گوٹھ میں مردان چوک کے نزدیک نامعلوم افراد کی فائرنگ سے ایک شخص45 سالہ حسن شاہ ولد نور محمد زخمی ہوا اور بعدازاں اس نے جناح اسپتال میں علاج کے دوران دم توڑ دیا۔ اس کے علاوہ نارتھ کراچی کے سیکٹر فائیو ایچ میں شادی لان کے قریب سے ایک شخص کی جلی ہوئی لاش ملی جس کی عمر تقریباً24 سال تھی۔ مقتول کی شناخت کلیم کے نام سے ہوئی ہے۔ بلدیہ کے علاقے گلشن غازی میں بھی کے ایم سی گرائونڈ سے ایک35 سالہ شخص کی لاش ملی جسے تشدد کرکے ہلاک کیا گیا جبکہ نارتھ کراچی کے سیکٹر فائیو ایل میں مسلح ملزمان نے رقم چھیننے کے دوران مزاحمت پر ایک نوجوان25 سالہ شہزاد ولد شفیق کو فائرنگ کرکے زخمی کر دیا۔