آل پاکستان انٹریونیورسٹی باکسنگ چیمپئن شپ 5 مارچ سے شروع ہو گی
لاہور(سپورٹس رپورٹر) ہائر ایجوکیشن کمشن کے زیراہتمام اور فاسٹ نیشنل یونیورسٹی کے تعاون سے آل پاکستان انٹر یونیورسٹی باکسنگ چیمپئن شپ 5 مارچ سے فاسٹ یونیورسٹی اسلام آباد میں شروع ہوگی۔ افتتاح برازیل کے سفیر جواو پولو سبو ڈا کوسٹا کریں گے۔ آرگنائزنگ سیکرٹری عون عباس ہاشمی نے بتایا کہ چیمپئن شپ میں ملک بھر سے 25 یونیورسٹی کی ٹیمیں حصہ لے رہی ہیں۔ چیمپیئن شپ میں دس کیٹگریز کے مقابلے ہونگے۔ امپائرنگ کے فرائض ارشد جاوید قریشی، غلام حسین پٹنی، بشیر شجاع، عطر نذیر، محبوب قریشی اور ناصر چوہان انجام دیں گے۔ چیمپئن شپ کی اختتامی تقریب 8 مارچ کو ہوگی جس کے مہمان خصوصی ہائر ایجوکیشن کمشن کے چیئرمین ڈاکٹر مختار احمد ہونگے۔
