لاہور(سپورٹس رپورٹر) سابق پاکستان ویمن ہاکی پلیئر نرگس خان نے وزیراعلیٰ پنجاب شہباز شریف سے اپیل کی ہے کہ کرکٹرز کی طرح ومین ہاکی پلیئرز کو بھی لائف ٹائم اچیومنٹ ایوارڈ کے ساتھ نقد انعام بھی دیا جائے۔ نرگس خان کا کہنا تھا کہ گزشتہ دنوں پاکستان ہاکی فیڈریشن ویمن ونگ کے زیراہتمام ہونے والے ویمن ہاکی ٹورنامنٹ کے موقع پر 1975ء سے 2016ء تک پاکستان ہاکی ٹیم کے لیے خدمات انجام دینے والی ویمن ہاکی کھلاڑیوں کی خدمات کو سراہا گیا جو انتہائی احسن اقدام ہے اس سے ماضی کی کھلاڑیوں کی حوصلہ افزائی ہوئی ہے۔ ملکی تاریخ میں پہلی مرتبہ ایسا ہوا ہے میری حکومت پاکستان، وفاقی وزیر بین الصوبائی رابطہ، وزیراعلیٰ پنجاب میاں شہباز شریف اور صوبائی وزیر کھیل پنجاب سے اپیل ہے کہ وہ اس بات کا نوٹس لیں اور کرکٹرز کی طرح لائف ٹائم اچیومنٹ ایوارڈ حاصل کرنے والی ویمن کھلاڑیوں کے لیے 10 لاکھ روپے فی کس خصوصی انعام کا بھی اعلان کر کے ان کی خدمات کو تسلیم کیا جائے۔ حکومت اگر ایسا کرتی ہے تو اس سے نہ صرف قومی کھیل ترقی کرئے گا بلکہ ومین کھلاڑیوں کی بھی حوصلہ افزائی ہوگی۔