لاہور (سپورٹس رپورٹر) پاکستان کرکٹ لیگ کی فرنچائز ٹیم لاہور قلندر کے چیف ایگزیکٹو افیسر رانا عاطف نے کہا ہے کہ بدقسمتی ہے کہ ہماری مڈل آرڈر بیٹنگ لائن نہیں چل رہی ہے، تجربات بھی اسی لیے کیے جا رہے ہیں تاکہ کھلاڑی کلک کر جائیں۔ نوائے وقت کے ساتھ خصوصی گفتگو کرتے ہوئے ان کا کہنا تھا کہ یہ درست ہے کہ ہماری ٹیم کو پانچ شکستیں ہو گئی ہیں لیکن ابھی ٹورنامنٹ اوپن ہے، امید ہے کہ اگلے پانچ میچز میں اچھی کارکردگی دکھا کر پلے آف میچز تک رسائی حاصل کرنے کی کوشش کرینگے۔ عمر اکمل سے مڈل آرڈر میں بہت ساری توقعات تھیں لیکن وہ بھی اچھی کارکردگی نہیں دکھا پا رہے ہیں۔ عاطف رانا کا کہنا تھا کہ ہار اور جیت ہوتی ہے بدقسمتی ہے کہ ہماری ٹیم جیت نہیں پا رہی اگر ایک مرتبہ جیت کے ٹریک پر چڑھ گئی تو اسے روکنا مشکل ہو جائے گا۔ پاکستان سپر لیگ کے ڈرافٹنگ کے عمل میں ہم نے بہترین کھلاڑیوں کا انتخاب کیا تھا۔