جھنگ(نامہ نگار) ڈسٹرکٹ سپورٹس کمیٹی کے زیراہتمام انٹر ڈویژن پنجا ب آر چری چیمپئن کے مقابلہ جات میں فیصل آبادکی ٹیم فاتح قرار پائی۔تقسیم انعامات کے سلسلہ میں ایک تقریب منعقدہ ہوئی جس میں ڈپٹی کمشنر مدثر ریاض ملک نے بطور مہمان خصوصی شرکت کی۔ چیمپئن شپ میں 50 اور 70 میٹر کی دو مختلف کیٹیگریز میں پنجاب کی فیصل آباد ، لاہور، گوجرانوالہ، بہاولپوراور سرگودھا سمیت6 ڈویژنز کے 50سے زائد کھلاڑیوں نے شر کت کی۔ پچاس میٹر میں مردو ںکے مقابلہ جات میں فیصل آباد کے مبشر پہلے ، گوجرانوالہ کے امجد دوسرے اور فیصل آباد کے عبد الرحمن تیسرے نمبر پر رہے جبکہ خواتین میںفیصل آباد کی سعدیہ پہلے،صائمہ دوسرے اور عشرت تیسرے نمبر پر ر ہیں ۔70میٹر میں مردوں کے مقابلہ جات میں فیصل آباد کے مبشر پہلے ،سرگودھا کے حسن دوسرے اور گوجرانوالہ کے امجد تیسرے نمبر پر جبکہ خواتین میں فیصل آباد کی سعدیہ پہلے ،بہاولپور کی حنا دوسرے اور فیصل آباد کی عشرت تیسرے نمبر پر رہی۔ مجموعی طور پر فیصل آباد ڈویژن نے پہلی ،بہاولپور دوسری جبکہ سر گودھا تیسری پوزیشن پر رہے۔ڈپٹی کمشنر مدثر ریاض ملک نے کرتے ہوئے کہا کہ صحت مندانہ سرگرمیوں سے نہ صرف کھیلوں کے میدان آباد ہوتے ہیں بلکہ عوام کو لطف اندوز ہونے کے مواقع بھی میسر آتے ہیں۔ انہوں نے کہا کہ کھلاڑیوں کا کسی بھی میدان میں کامیابی حاصل کرنا ضلع کا نام روشن کرنے کی دلیل ہے۔ بعدازاں مہمان خصوصی ڈپٹی کمشنر مدثر ریاض ملک نے فاتح ٹیموں کے کھلاڑیوں میں ٹرافیاں اور انعامات تقسیم کئے۔