گوجرانوالہ(نمائندہ خصوصی) سیٹلائٹ ٹاؤن میں واقع ایک چار منزلہ جنرل سٹور میں آگ لگنے سے لاکھوں روپے مالیتی سامان جل کر راکھ آگ نے قریبی عمارتوں کو بھی لپیٹ میں لے لیا۔بتایاگیاکہ علی الصبح شارٹ سرکٹ کے باعث جنرل سٹور میں آگ بھڑک اٹھی جبکہ اطلاع ملنے پر ریسکیو1122 کی ٹیمیں موقع پر پہنچیں اور آگ بجھانے کی کارروائی شروع کی۔ آگ اتنی شدید تھی کہ اس نے آس پاس کی عمارتوں کو بھی اپنی لپیٹ میں لے لیا ریسکیو کی سات گاڑیاں آگ پرقابو پانے میں مصروف رہیں ۔ آٹھ گھنٹے کے آپریشن کے بعد آگ پر قابو پالیاگیا۔بتایاگیاہے کہ اس شاپنگ مال میں الیکٹرونکس ‘ کھانے پینے کے سامان سمیت لاکھوں روپے کا سامان موجود تھا جو جل کر راکھ ہوگیا ہے۔ آگ بجھانے کی کوشش میں دھویں کی شدت سے ایک ریسکیو اہلکار کی حالت بھی خراب ہوگئی جسے طبی امداد کیلئے ہسپتال پہنچا دیاگیاہے۔