شارجہ(نمائندہ سپورٹس) کراچی کنگز کے کوچ مکی آرتھر نے کہا ہے کہ ان کی ٹیم کے کپتان عماد وسیم کو سی ٹی سکین کے لیے وسپتال لے جایا گیا ہے۔انہوں نے کہا کہ عماد کو آبزرویشن میں رکھا جائے گا تاہم بظاہر وہ ٹھیک نظر آرہے ہیں۔میچ کے 19ویں اوور میں سہیل خان کا کیچ لیتے ہوئے عماد وسیم سر کے بل گرگئے تھے جس کے بعد انہیں گراؤنڈ سے سٹریچر پر لے جایا گیا۔لاہور قلندرز کے خلاف میچ کے بعد پریس کانفرنس کرتے ہوئے مکی آرتھر نے کہا کہ ان کی ٹیم نے تقریباً 10 رن کم بنائے تھے تاہم اس کے باوجود وہ اس کا دفاع کرنے کے قریب پہنچ گئے تھے، اگر نو بال نہیں ہوتی تو میچ جیت جاتے۔مکی آرتھر نے کہا کہ عثمان شنواری ڈریسنگ روم میں نو بال کروانے پر بہت افسردہ تھے، وہ ایسے تجربے سے سیکھیں گے۔کراچی کنگز کے کوچ نے کہا کہ لاہور قلندرز کے بیٹسمین آغا سلمان نے بہترین اننگز کھیلی۔لاہور قلندرز نے سنسنی خیز مقابلے کے بعد کراچی کنگز کو سپر اوور میں شکست دی تھی۔لاہور کی اننگز میں آغا سلمان نے نصف سنچری سکور کی تھی جس کی وجہ سے انہیں میچ کا بہترین کھلاڑی بھی قرار دیا گیا۔