کراچی (آئی این پی) فیڈرل بی ایریا دستگیر میں لٹیروں نے لاکھوں روپے کی چھالیہ لوٹ لی۔ ذرائع کے مطابق کراچی کے علاقے فیڈرل بی ایریا دستگیر کے بلاک 14 میں ہفتے اور اتوار کی درمیانی شب ڈاکوؤں نے پان، چھالیہ اورکنفیکشنری کی دکان پر نقب لگائی، چور دکان کے شٹرکے کنڈے کاٹ کر اندر داخل ہوئے اور چھالیہ اٹھا کر لے گئے۔ دکان مالک نے کہا کہ نامعلوم ملزمان نے تین لاکھ روپے مالیت کی چھالیہ لوٹی اور ملزمان نے چھالیہ کے علاوہ کسی چیز کو ہاتھ نہیں لگایا۔ واضح رہے کہ دوماہ قبل مارکیٹ میں 250 روپے کلو فروخت ہونے والی چھالیہ اب 3 ہزار روپے کلو میں فروخت ہورہی ہے۔