راولپنڈی (این این آئی) پولیس نے حساس علاقے بنک روڈ پر مقامی اخبار کے صحافی انجم منیب راجہ کے قتل میں ملوث ملزم قیصر رحمٰن کو گرفتار کرنے کا دعویٰ کردیا۔پولیس کے مطابق ملزم قیصر رحمٰن مقتول کے ساتھ دسمبر 2017 ء میں اسی اخبار میں بطور پیج میکر کام کرتا تھا اور قتل سے قبل مکمل تعاقب کرکے اس نے 2 مارچ کو نوجوان صحافی کو چھ گولیاں مار کر قتل کر دیا تھا۔پولیس حکام کا کہنا تھا کہ ملزم اور مقتول کی آپس میں ذاتی رنجش چلی آرہی تھی جس وجہ سے قتل کیا گیا۔سینئر سپرنٹنڈنٹ پولیس آپریشنز محمد بن اشرف نے بتایا کہ 2 مارچ کی رات صحافی انجم منیب کو اس وقت قتل کیا گیا جب وہ دفتر سے چھٹی کرکے گھر جا رہے تھے۔ایس ایس پی محمد بن اشرف نے بتایا کہ یہ اندھا قتل تھا جسے ٹریک کرنا بہت مشکل عمل تھا۔ خالی سڑک دیکھ کر ملزم نے صحافی انجم منیب کو قتل کیا اور موقع سے فرار ہو گیا۔ ایس پی پوٹھار ڈویژن سید محمد علی نے بتایا کہ دونوں کے مابین ذاتی رنجش چلی آ رہی تھی ٗقاتل کو گرفتار کرکے اس سے اسلحہ برآمد کر لیا گیا ہے تاہم سی سی ٹی وی ریکارڈنگ سمیت دیگر بنیادوں پر ملزم کو گرفتار کرنے میں سول لائنز پولیس کامیاب ہوئی۔