اوکاڑہ ، جہانیاں، گلیات، پنگریو (نامہ نگار+نوائے وقت رپورٹ) مختلف ٹریفک حادثات میں دو سگے بھائیوں اور باپ بیٹا سمیت 8 افراد جاں بحق اور 11 زخمی ہوگئے۔ اوکاڑہ میں ٹرک کی ٹکر سے موٹرسائیکل سوار 2 بھائی جاں بحق ہوگئے۔ نواحی گائوں منڈی احمدآباد کے دو سگے بھائی ضمیر اور منیر موٹرسائیکل پر پاکپتن روڈ کے قریب جا رہے تھے بے قابو ٹرک نے ٹکر دے ماری جس سے دو نوں بھائی زخموں کی تاب نہ لاتے دم توڑ گئے۔ جہانیاں میں ٹرلر نے موٹر سائیکل کو ٹکر مار دی جس کے نتیجے میں 2 افراد جاں بحق اور 3 زخمی ہوگئے۔ گلیات میں وین کھائی میں جا گری جس کے نتیجے میں ڈرائیور سمیت 2 افراد جاں بحق اور 5 زخمی ہوگئے۔ پنگریلو میں ٹرک اور کار کے تصادم میں باپ بیٹا جاں بحق اور تین افراد زخمی ہوگئے۔