سینٹ الیکشن میں کامیابی شروعات ہے، مزید سرپرائز دینگے: زرداری
ملتان (نمائندہ نوائے وقت) سابق صدر آصف علی زرداری نے کہا ہے کہ حالیہ سینٹ الیکشن میں کامیابی پاکستان پیپلز پارٹی کی کامیابیوں کی شروعات ہے جیسے جیسے منزل قریب آئے گی مزید کامیابیاں ملیں گی۔ ان خیالات کا اظہار انہوں نے گزشتہ روز مختصر دورہ ملتان کے دوران پارٹی رہنماؤں سے بات چیت کرتے ہوئے کیا۔ آصف علی زرداری نے مزید کہاکہ آئندہ عام انتخابات میں پاکستان پیپلز پارٹی مزید سرپرائز دیگی۔ آصف علی زرداری اتوار کی شب بذریعہ خصوصی طیارہ کراچی سے ملتان پہنچے۔ ڈاکٹر عاصم بھی ان کے ہمراہ تھے۔ ایئر پورٹ پر انکا استقبال سابق وزیراعظم سید یوسف رضاگیلانی ، مخدوم احمد محمود، سید احمد مجتبیٰ گیلانی، خواجہ رضوان عالم، راؤ ساجد علی اور عبدالقادر شاہین نے کیا۔ آصف علی زرداری ایئر پورٹ سے سید ھے ایم جی ایم ہال پہنچے اور دعوت ولیمہ تقریب میں شرکت کے بعد واپس کراچی کیلئے روانہ ہوگئے۔ مزید براں سابق وفاقی وزیر سید حامد سعید کاظمی کے صاحبزادے احمد سعید کاظمی کی دعوت ولیمہ سیاسی اجتماع میں تبدیل ہوگیا۔ جس میں سابق صدر آصف علی زرداری، سابق وزیراعظم سید یوسف رضا گیلانی، سابق گورنر پنجاب مخدوم احمد محمود ، پاکستان تحریک انصاف کے سینئر وائس چیئرمین مخدوم شاہ محمود قریشی، سینئر سیاستدان مخدوم جاوید ہاشمی، ڈاکٹر عاصم، سید مظہر سعید کاظمی، مرید حسین قریشی، معین الدین کوریجہ سمیت کئی سیاستدانوں، علمائے کرام مشائخ عظام اور معززین شہر نے کثیر تعداد میں شرکت کی۔
