اسلام آباد(آن لائن)وفاقی حکومت کی جانب سے مہمند ڈیم اور دیا میر بھاشا ڈیم منصوبے کو فنڈز کی منظوری کے لیے آئندہ ہفتے سنٹرل ڈویلپمنٹ ورکنگ کمیٹی میں پیش کیا جائے گا، حکومت اپریل تک مہمند ڈیم کا سنگ بنیاد رکھ دے گی، اسی طرح 1کھرب 23ارب 81کروڑ روپے لاگت کا دیا میر بھا شا ڈیم کے فنڈز کی منظوری کے لیے پیش کیا جائے گا، ذرائع کے مطابق وفاقی حکومت کی جانب سے سینٹرل ڈویلپمنٹ ورکنگ کمیٹی کا اجلاس آئندہ ہفتے بلا لیا گیا ہے، اجلاس میں اربوں روپے مالیت کے 33منصوبے منظوری کے لیے پیش کیے جائیں گے، ان منصوبوں میں بجلی کی پیداوار کے سلسلے میںمہمند ڈیم ہائیڈ رو پاور پیداواری صلاحیت 800 میگاواٹ ہو گی اور 1کھرب 95 ارب 91کروڑ روپے لاگت کا تخمینہ ہے وفاقی حکومت اپریل تک مہمند ڈیم کا سنگ بنیاد رکھ دے گی، اسی طرح 1کھرب 23ارب 81کروڑ روپے لاگت کا دیا میر بھا شا ڈیم بھی اجلاس میں فنڈز کی منظوری کے لیے پیش کیا جائے گا، دیامیر بھاشا ہائیڈ رو پاور پراجیکٹ 4500 میگاواٹ بجلی کی پیداواری صلاحیت کا منصوبہ ہے۔سندھ اور بلوچستان کے ساحلی علاقوں میں سمندری پانی سے کٹاؤ اور سمندری سطح میں اضافے کی مانیٹرنگ اور اس کو روکنے کے لیے 65کروڑ روپے لاگت کا منصوبہ بھی آئندہ اجلاس میں منظوری کے لیے پیش کیا جائے گا، 13کروڑ 81لاکھ روپے لاگت سے وزیر اعظم اسکیم کے تحت یونیورسٹی کے طلبا کو الیکٹرک ویل چیئرز کی فراہمی کا منصوبہ بھی پیش کیا جائے گااس کے علاوہ اجلاس میں 5ارب 3کروڑ 99 لاکھ روپے کی لاگت سے گوادر میں ریلو ے کوریڈور کے لیے لینڈ ایکوزیشن کا منصوبہ، 2 ارب 69کروڑ 61 لاکھ روپے لاگت سے نیو اسلام آباد انٹرنیشنل ایئرپورٹ پر ایئرپورٹ سکیورٹی فورس کے لیے رہائش گاہوں کی تعمیر، 16ارب 42کروڑ 78لاکھ روپے لاگت سے پشاور موڑ سے نیو اسلام آباد انٹرنیشنل ایئرپورٹ تک انفرااسٹرکچر اور الائیڈ ورکس کی تعمیرکا منصوبہ، نیشنل کالج آف آرٹس لاہور میں انفرااسٹرکچر فیسلیٹی کی اپ گریڈیشن، ڈسٹرکٹ کرک خیبرپی کے میں انسٹی ٹیوٹ آف پٹرولیم ٹیکنالوجی کے قیام، گلگت میں میڈیکل کالج کے قیام، نوشہروفیروز میںفروٹ اینڈ ویجی ٹیبل پروسیسنگ سینٹر کے قیام، چین پاکستان اکنامک کوریڈور انڈسٹریل کوآپریشن ڈیولپمنٹ پروجیکٹ، پی ٹی وی کے کیمرے اور پروڈکشن آلات کی ماڈرنائزیشن سمیت 33منصوبے منظوری کے لیے پیش کیے جائیں گے۔