اسلام آباد (این این آئی) وزیراعظم شاہد خاقان عباسی کے چیئرمین سینٹ کے خلاف بیان پر تحریک انصاف نے اسپیکر قومی اسمبلی کو معاملے میں مداخلت کی درخواست کرتے ہوئے خط لکھ دیا۔ پاکستان تحریک انصاف کے رہنما فدا محمد خان کی جانب سے سپیکر قومی اسمبلی ایاز صادق کو لکھے گئے خط میں وزیراعظم شاہد خاقان عباسی کے بیان کے بعد پیدا ہونے والی سیاسی کشیدگی کے خاتمے کیلئے کردار ادا کرنے کا کہا گیا ہے۔ خط میں کہا گیا کہ وزیراعظم مسلسل چیئرمین سینیٹ کے خلاف بیان دے رہے ہیں۔ ان کے بیان کے بعد پیدا ہونے والی صورتحال پر آپ کی خصوصی توجہ درکار ہے۔ آپ کی معاملے میں مداخلت سیاسی کشیدگی کو کم کر سکتی ہے۔ رہنما پی ٹی آئی فدا محمد خان نے مزید کہا کہ معاملے میں آپ کی مداخلت سے مثبت نتائج آئیں گے۔