ساہیوال، چیچہ وطنی (نمائندہ نوائے وقت+ نامہ نگار ) ساہیوال ملتان روڈ پر چیک پو سٹ اقبال نگر کے قریب ملک ٹینکر اور ٹرالر میں تصادم کے نتیجہ میں تین افراد جاں بحق اور دو شدید زخمی ہو گئے۔ تفصیلات کے مطابق محمد نواز عارف والا سے ملک ٹینکرلے کرملتان جا رہا تھا جبکہ پر ویز،غلام علی کے ہمراہ دودھ لے کر ملتان جا رہے تھے۔ چیک پو سٹ کے قریب دونوں گاڑیاں ایک دوسرے سے ٹکرا گئیں جس کے نتیجہ میں عمر حیات،محمد اسماعیل اور غلام علی مو قع پر ہلاک جبکہ محمد نواز اور پر ویز شدید زخمی ہو گئے ۔تینوں نعشوں اور زخمیوں کو سول ہسپتال شفٹ کر دیا گیا ۔مر نے والا عمر حیات تاندلیانوالہ ،غلام علی عارف والا اور محمد اسماعیل کوئٹہ کا رہنے والا ہے ۔دونوں زخمیوں محمد نواز اور پر ویز کی بھی حالت نازک ہے۔پولیس نے مو قع پر پہنچ کر تفتیش شروع کر دی ہے۔