اسلام آباد (نوائے وقت رپورٹ) ترک چیف آف جنرل سٹاف نے ایئر ہیڈ کواٹرز اسلام آباد کا دورہ کیا۔ ایئر چیف مارشل مجاہد انور نے معزز مہمان کا استقبال کیا۔ ترجمان کے مطابق پاک فضائیہ کے چاق و چوبند دستے نے جنرل ہولوسی کو سلامی پیش کی۔ ایئر چیف اور جنرل ہولوسی نے ملاقات میں پیشہ ورانہ امور پر تبادلہ خیال کیا۔ جنرل ہولوسی نے پاک فضائیہ کی پیشہ ورانہ مہارت کو سراہا اور دہشت گردی کے خلاف جنگ میں پاک فضائیہ کی تعریف کی۔ انہوں نے پاک فضائیہ کے تجربات سے سیکھنے کی خواہش کا اظہار کیا۔ ایئر چیف مجاہد انور نے کہا کہ پاکستان اور ترکی کے درمیان دوستانہ اور برادرانہ تعلقات ہیں۔ ترک فضائیہ کو تربیت میں بھرپور مدد اور تعاون کی پیشکش کرتے ہیں۔