کوئٹہ: فرنٹیئر کور نے بس لوٹنے کی کوشش ناکام بنا دی، فائرنگ کا تبادلہ، بدنام زمانہ ڈاکو زخمی حالت میں گرفتار
کوئٹہ (بیورو رپورٹ) بختیار آباد کے قریب فرنٹیئر کور نے مسافر بس کو لوٹنے کی کوشش ناکام بناتے ہوئے فائرنگ کے تبادلے کے بعد بدنام زمانہ ڈاکو کو زخمی حالت میں گرفتار کر لیا۔ ایف سی ترجمان کے مطابق اتوار کو بختیار آبادکے قریب قومی شاہراہ پر مسلح ڈاکووں نے ایک مسافر بس کو روک کر اسلحہ کے زور پر مسافروں سے نقدی اور قیمتی اشیاء چھیننے کی کوشش کی بروقت اطلاع ملنے پر فرنٹیر کور موقع پر پہنچی تو ملزمان فرار ہو گئے۔ تعاقب کرنے پر ملزمان نے فائرنگ کر دی جوابی کارروائی کے بعد فرنٹیر کور نے بدنام زمانہ ڈاکو احمد کو گرفتار کر کے ایک کلاشنکوف اور دیگر اسلحہ قبضے میں لے لیا۔
