بلاول بھٹو زرداری آج لاہور سے ملتان روانہ ہوں گے، کل لیہ میں جلسہ سے خطاب کرینگے
لاہور(آن لائن)چیئرمین پیپلزپارٹی بلاول بھٹو زرداری (آج)بدھ کو جنوبی پنجاب کے تین روزہ دورے پر ملتان جائیں گے ۔پیپلزپارٹی ذرائع کے مطابق بلاول بھٹو زرداری بدھ کو جنوبی پنجاب کے تین روزہ دورے پر ملتان کیلئے روانہ ہوں گے جہاں وہ جنوبی پنجاب کے رہنمائوں بالخصوص سابق وزیراعظم سید یوسف رضا گیلانی سے ملاقاتیں کریں گے۔ ذرائع کے مطابق ملاقاتوں کے دوران پیپلزپارٹی کو جنوبی پنجاب میں مزید مضبوط بنانے سے متعلق پارٹی پالیسی پر تبادلہ خیال کیا جائیگا تاکہ آئندہ انتخابات میں جنوبی پنجاب سے پیپلزپارٹی کلین سویپ کرسکے ۔بلاول بھٹو زرداری ملاقاتوں کے بعد ملتان سے لیہ کیلئے روانہ ہوں گے جہاں وہ 10 مئی کو جلسہ عام سے خطاب کریں گے۔ذرائع کے مطابق پیپلزپارٹی کے چیئرمین ملتان سے کراچی کیلئے روانہ ہوں گے جہاں وہ 12 مئی کو جلسہ عام سے خطاب کریں گے ۔
