لاہور ( سپورٹس رپورٹر+نمائندہ سپورٹس )ویسٹ انڈیز اور پاکستان ویمن کرکٹ ٹےمےںآئندہ سال جنوری میں کرکٹ سیریز کھیلیں گی۔ پاکستان کرکٹ بورڈ آئندہ برس ویسٹ انڈین خواتین کرکٹ ٹیم کی میزبانی کریگا۔ پی سی بی ذرائع کے مطابق ویسٹ انڈیز اور قومی خواتین کرکٹ ونگ کے درمیان سیریز کے معاملات طے پاگئے ہیں جہاں پاکستان کرکٹ بورڈ کی میزبانی میں ہونیوالی سیریز میں ون ڈے، ٹی ٹونٹی میچز کھیلے جائیں گے۔ پاکستان ویسٹ انڈیز سیریز کے مقامات کا فیصلہ تاحال نہیں کیا گیا تاہم رواں برس قومی ویمن ٹیم اکتوبر میں ملائشیا میں آسٹریلیا کی میزبانی کررہی ہے اور اس سیریز کے بعد ویسٹ انڈیز پاکستان سیریز کی میزبانی ملائیشیا کو دی جاسکتی ہے۔ پاکستان خواتین کرکٹ ٹیم آئندہ برس مئی میں جنوبی افریقہ کا بھی دورہ کریگی۔ پاکستان ویمن ٹیم نے اس برس ایشیا کپ اور ٹی ٹونٹی ورلڈکپ میں شرکت کرنا ہے۔