اسلام آباد (آئی این پی) عوامی نیشنل پارٹی کے رکن قومی اسمبلی غلام احمد بلور نے کہا ہے کہ جج اور جرنیل مر جاتے ہیں لیکن سیاستدان مر کر بھی زندہ رہتے ہیں اور ان کا نام تاریخ میں باقی رہتا ہے، نواز شریف اس پارلیمنٹ کے سربراہ تھے کوئی لنڈا بازار کے تاجر نہیں کہ روزانہ عدالتوں میں پیشیاں بھگتتے رہیں، ملک کی کوئی عدالت پرویز مشرف کو غداری کے مقدمات میں کٹہرے میں کھڑا نہیں کرتی، افسوس کا مقام ہے کہ آج پاکستان میں سیاستدانوں کے علاوہ سب صادق و امین بنے ہوئے ہیں۔ وہ جمعرات کو پارلیمنٹ ہا¶س کے باہر میڈیا سے گفتگو کر رہے تھے۔ انہوں نے کہا کہ پارلیمان پاکستان کا سپریم ادارہ ہے۔ پاکستان کی عزت اس عمارت میں بیٹھے سیاستدانوں کی عزت ہوتی ہے۔ جو شخص ملک کا 3 بار وزیر اعظم اور بڑی جماعت کا سربراہ رہا ہو اس کی عزت کرنا ملک کے اداروں کا فرض ہے۔ یہ نہیں کہ جس کا دل کیا اٹھ کر جو مرضی الزام لگا دیا۔ نواز شریف کو کروڑوں عوام نے ووٹ دئیے ہیں اور وہ عوامی نمائندے ہیں۔ پرویز مشرف پر بھی غداری کے مقدمات ہیں لیکن وہ مزے سے بیرون ملک بیٹھے ہیں۔ پوری قوم نیب کے اس طریقہ کار کی مذمت کر رہی ہے اور نیب کے صرف ایک جماعت کے خلاف سیاسی کارروائیوں سے مطمئن نہیں ہے۔ اگر پاکستان میں ججوں اور جرنیلوں کی عزت ہوتی ہے تو سیاستدانوں کی بھی عزت اتنی ہی ہونی چاہئے۔ ایسا نہیں ہے کہ صرف سیاستدان کرپٹ ہیں اور باقی سب دودھ کے دھلے ہیں۔ جج اور جرنیل مر جاتے ہیں لیکن سیاستدان مر کر بھی زندہ رہتے ہیں اور ان کا نام باقی رہتا ہے تاریخ میں۔
غلام احمد بلور