اسلام آباد(نمائندہ نوائے وقت)سپریم کورٹ آف پاکستان نے طلال چوہدری کی جانب سے سماعت دو ہفتے تک ملتوی کرنے کی استدعا مسترد کردی۔ وزیر مملکت برائے داخلہ طلال چوہدری عدالت میں پیش ہوئے، پراسیکیوٹر نے کہا ملزم کا 342 کا بیان ریکارڈ ہونا ہے، طلال چوہدری نے کہا میرے وکیل کوئٹہ میں ہیں۔ جسٹس گلزار احمد نے کہا کہ کیس یہاں ہے تو وکیل کوئٹہ کیا کررہے ہیں؟ طلال چوہدری نے سماعت دو ہفتے تک ملتوی کرنے کی استدعا کردی۔ جسٹس گلزار احمد نے ریمارکس میں کہا کہ اتنا لمبا التوا نہیں دے سکتے، ذاتی مصروفیات پر التوا نہیں دیتے۔ طلال چوہدری نے کہا میرے ساتھی ایم این اے کا انتقال ہوا ہے، کیس کی سماعت کے باعث ان کے جنازے میں شرکت نہیں کرسکا۔ جسٹس گلزار احمد نے کہا کہ ایم این اے کے انتقال پر افسوس ہے، آپ دو دن وہاں تعزیت کر آئیں، آئندہ سوموار سے زیادہ کا وقت نہیں دیں گے۔ سماعت اکیس مئی تک ملتوی کردی۔