فیروزوالہ، گوجر خان (نامہ نگار) جی ٹی روڈ پرمسہ کسوال کے قریب ٹریفک حادثے میں ڈی آئی جی لاہور کے بھائی جاں بحق ہو گئے۔ لاہور پولیس کے ڈی آئی جی رانا شہزاد اکبر کے بھائی فہیم انور اپنی کرولا کار میں راولپنڈی سے لاہور جا رہے تھے کہ مسہ کسوال آئل فیلڈز کے قریب ان کی کار گوشت سے لدے مزدا ٹرک سے جا ٹکرائی جس کے نتیجے میں فہیم انور موقع پر ہی جاں بحق ہو گئے۔ واقعہ کی اطلاع ملتے ہی سی پی او راولپنڈی دیگر اعلیٰ افسران کے ہمراہ ٹی ایچ کیو ہسپتال پہنچے اور اپنی نگرانی میں مرحوم کی میت کو لاہور منتقل کیا۔ علاوہ ازیں فیروزوالہ میں نادراآفیسرسمیت دو افراد جاں بحق اورتین افراد زخمی ہوگئے۔ امامیہ کالونی ریلوے پھاٹک کے قریب تیزرفتار ٹرالہ نے موٹرسائیکل سوارنادرافیروزوالہ کے ڈپٹی سپرنٹنڈنٹ آفیسرآغاعلی رضاکوروند ڈالا جوموقع پرجاں بحق ہوگیا۔ حادثے کے بعد ڈرائیور فرارہوگیا۔ سبزہ زارلاہورکا 31 سالہ نادرا آفیسر آغا علی رضا رچناٹائون فیروزوالہ دفترسے فارغ ہوکرموٹرسائیکل پر سوار ہوکر لاہور جا رہا تھا۔ فیروزوالہ پولیس نے متوفی کے ماموں مظہرحسین آغاکی رپورٹ پرٹرالہ ڈرائیور کیخلاف مقدمہ درج کرلیا۔ کوٹ عبدالمالک کے قریب موٹرسائیکل رکشہ سے گرکرنوجوان الیاس جاںبحق ہوگیا۔ الیاس رکشہ پر شاہدرہ آرہاتھا کہ گلفشاں ٹائون کے قریب رکشہ سے سڑک پرگرگیااورموقع پرہی دم توڑ گیا۔ فیکٹری ایریا پولیس نے رپورٹ درج کرلی۔ علاوہ ازیں شاہدرہ کے قریب کارکی ٹکرسے موٹرسائیکل سوارخرم نامی شدید زخمی ہوگیا جبکہ لاہورروڈ پررکشہ موٹرسائیکل سے ٹکراگیاجس سے دوافراد زخمی ہوگئے ۔