لاہور (نمائندہ سپورٹس) یونیورسٹی آف سنٹرل پنجاب نے انٹرورسٹی سپورٹس چیمپئن شپ 2017-18 میں 170 یونیورسٹیز کو پیچھے چھوڑ کر پہلی پوزیشن حاصل کر لی۔ چیمپئن شپ میں یونیورسٹی آف سنٹرل پنجاب کے اتھلیٹس چھائے رہے۔ 170 یونیورسٹیز کو ہرا کر مسلسل ساتویں مرتبہ پہلی پوزیشن حاصل کرنے پر کھلاڑی نہ صرف خوش ہیں بلکہ یو سی پی میں ملنے والی سہولیات کے بھی معترف ہیں۔ ایونٹ میں یو سی پی نے اتھلیٹکس، باڈی بلڈنگ اور باکسنگ سمیت 31 کھیلوں میں 4009پوائنٹس حاصل کئے۔ پنجاب یونیورسٹی 2631 پوائنٹس کے ساتھ دوسرے نمبر پر رہی۔ ڈائریکٹر سپورٹس یو سی پی محمد ارشد ستار کا کہنا ہے کہ ماضی میں پنجاب یونیورسٹی کھیل کے مقابلوں میں سب سے آگے تھی اور اب یونیورسٹی آف سنٹرل پنجاب نے ان کی برتری ختم کی۔ کھیلوں کا قومی میدان ہو یا عالمی سرکٹ، قومی کرکٹر حسین طلعت، فہیم اشرف، گولڈ میڈلسٹ پہلوان انعام بٹ، طیب، محمد بلال اور باڈی بلڈر سلمان یو سی پی اور ملک کی نمائندگی کرتے ہوئے فتح کے جھنڈے بلند کر چکے ہیں۔
اسی روایت کو برقرار رکھتے ہوئے اس سال بھی یونیورسٹی آف سنٹرل پنجاب نے آل پاکستان انٹرورسٹی شپ میں برتری کی دھاک برقرار رکھی۔