لاہور، سید والا، حافظ آباد، فیصل آباد( نامہ نگار+ نمائندگان) گرین ٹائون کے علاقہ میں مبینہ طور پر گھریلو حالات سے تنگ20 سالہ لڑکی نے زہریلی گولیاں کھا کر خودکشی کر لی، شک گزرنے پر پولیس نے نعش پوسٹمارٹم کیلئے مردہ خانے بھجوا دی ۔ پولیس کے مطابق موت کی وجوہات کا پوسٹ مارٹم رپورٹ آنے کے بعد معلوم ہو سکے گا۔ رمشا نے مبینہ طور پر اہل خانہ سے جھگڑے پر زہریلی گولیاں نگل لیں۔ طبیعت بگڑنے پر اسے جناح ہسپتال لایا گیاتاہم وہ جانبر نہیں ہو سکی اور ہسپتال میں دم توڑ دیا۔دریں اثنا گھریلو جھگڑوں اور عید پر نئے کپڑے نہ بننے پر 13 سالہ طالب علم اور خاتون سمیت 2 افراد نے خودکشی کرلی۔ فیصل آباد میں 55 سالہ ناصرہ بی بی کا گھر والوں سے جھگڑا ہو گیا جس سے دلبر داشتہ ہو کر خاتون نے زہریلی گولیاں نگل لیں۔ سیدوالا میں گائوں ٹھٹھہ رحم شاہ میں آٹھویں جماعت کے طالب علم مشرف نے والدہ سے عید کے کپڑوں کیلئے پیسے مانگے لیکن ماں کے انکار پر دلبرداشتہ ہوکر 13سالہ طالبعلم نے گلے میں پھندا ڈال کر کمرے کی چھت سے لٹک کر زندگی کا خاتمہ کر لیا۔حافظ آباد کے نواحی گائوں خانپور میں 32 سالہ مختار نے مبینہ طور پر گھریلو تنازعہ پر گندم میں رکھنے والی زہریلی گولیاں نگل کر زندگی کا خاتمہ کرلیا۔