لاہور، فیروزوالا (سٹاف رپورٹر+ نامہ نگار) ٹریفک حادثات میں 2افراد جاں بحق جبکہ 10زخمی ہوگئے۔ تھانہ اسلام پورہ کے علاقہ میں تیز رفتار ٹرک بے قابو ہو کر الٹ گیا ٹریفک حادثہ میں ایک شخص ہلاک اور تین زخمی ہوگئے معلوم ہو اہے کہ رنگ روڈ پر سگیاں سے بتی چوک جاتے ہوئے پیاز سے بھرا ہوا ٹرک تیز رفتاری کی وجہ سے بے قابو ہوکر الٹ گیا حادثہ کے باعث پاس سے گزرنے والا سائیکل سوار62سالہ آفتاب احمد ٹرک تلے دب گیا اور موقع پر ہی دم توڑ گیاجبکہ موٹرسائیکل سوار دو افراد اور ٹرک ڈرائیور بھی شدید زخمی ہوگیا، تینوں زخمیوں کو طبی امداد کیلئے ہسپتال منتقل کردیا گیا جبکہ لاش کو ریسکیو حکام نے مردہ خانے منتقل کردیا ہے، حادثے کے بعد پولیس کی بھاری نفری جائے وقوعہ پر پہنچ گئی اور ٹرک کو کرین کی مدد سے سٹرک سے ہٹادیا ۔جی ٹی روڈ پر ٹریفک حادثات میں نوجوان ہلاک اور 7افراد زخمی ہوگئے۔ بتایا گیا ہے کہ ساہوکی ملیاں کا رہائشی نوجوان محمد عدنان اپنی موٹرسائیکل پر جارہا تھا کہ ہائوسنگ کالونی کے قریب تیز رفتار ٹرک نے اسے ٹکر مار دی جس کے نتیجہ میں وہ موقع پر ہلاک ہوگیا۔ کالاخطائی روڈ پر کار نے موٹرسائیکل سوار کر ٹکر مار دی جس کے باعث ذوالفقار احمد‘ اس کی بیوی اور بچے زخمی ہوگئے۔ لاہور روڈ پر تیز رفتار گاڑی کی سائیڈ لگنے سے رکشہ الٹ گیا‘ چار افراد زخمی ہوگئے۔