حیدر آباد دکن (صباح نیوز) بھارت نے 3پاکستانیوں کو 14سال بعد بھارتی شہریت دے دی۔ بھارتی میڈیا کے مطابق3 بھائیوں کو جن کی پیدائش پاکستان میں ہوئی تھی، تقریبا14سال بعد بھارتی شہریت دیدی گئی۔ اس سلسلہ میں تلنگانہ کے نظام آباد میں ان نوجوانوں کو بھارتی شہریت کی دستاویزات حوالے کی گئیں۔ ماں کی شادی 1988 میں پاکستانی باشندہ سے ہوئی تھی جس کے بعد یہ خاتون پاکستان منتقل ہوگئی تاہم طلاق کے بعد یہ خاتون اپنے 3 بچوں کے ساتھ نظام آباد واپس آگئی۔ اس خاتون کے 3 بچے طویل المدت ویزا پر تھے۔ مرکز نے بھارتی شہریت کیلئے ان کی درخواست کی منظوری دے دی۔ اس سلسلہ میں سرٹیفکیٹس سنان، رومان اور سیف کو نظام آباد ریونیو ڈویژنل افسر نوین کمار نے حوالے کئے۔ افسروں کے مطابق نظام آباد کی بودھن روڈ علاقہ میں رہنے والی 55سالہ فیض النسا بیگم کی شادی 1988میں پاکستان کے بہاولپور کے رہنے والے ندیم جاوید کے ساتھ ہوئی تھی جس کے بعد یہ خاتون بہاولپور منتقل ہوگئی تھی۔ اس جوڑے کے 3بیٹے ہیں تاہم خاندانی تنازعات کے سبب ان کی 2004میں علیحدگی ہوگئی۔ قواعد کے مطابق کوئی بھی بیرونی شہری7 سال تک ہندوستان میں قیام کے بعد ہی یہاں کی شہریت کے لئے درخواست دے سکتا ہے۔