لاہور (نوائے وقت رپورٹ) مسلم لیگ(ن) کے رہنما خواجہ سعدرفیق نے کہا ہے کہ وہ سیاست جو نفرتیں اور فتنہ پیدا کرے‘ ہم اس کے مخالف ہیں۔ ہمیں پچھلے پانچ سال سے نان سٹاپ گالیاں دی جارہی ہیں۔ سیاست کی لڑائی عدالتوں میں نہیں میدان میں اچھی لگتی ہے۔ عمران خان جیسا بدزبان کبھی نہیں دیکھا۔ عمران خان کی سیاست تضادات کی سیاست ہے‘ وہ جو کہتے ہیں کرتے نہیں۔ کیا عمران نے کسی نوجوان کو ٹکٹ دیا۔ بعض ٹی وی چینلز پر اینکرز نما چیزیں ہمارے خلاف ہیں۔ میں نے مسلم لیگ(ن) کے کارکنوں کی آنکھوں میں غضب کا غصہ دیکھا ہے۔ کارکن بتاتے ہیں کہ ہم صرف ووٹ نہیں ڈالیں گے بلکہ کڑاکے بھی نکال دیں گے۔ ہم سمجھاتے تھے سیاست کی لڑائی عدالتوں میں نہ لیکر جائو‘ یہ وہ لوگ ہیں جو اداروں کے درمیان لڑائی کرواتے ہیں۔ پی ٹی آئی میں سیاسی لنڈا بازار اکٹھا ہوگیا ہے جس کو کوئی سیاسی جماعت منہ نہیں لگاتی‘ وہ پی ٹی آئی میں ہے۔