لاہور(خصوصی رپورٹر)مسلم لیگ (ن)کے صدر و سابق وزیر اعلیٰ پنجاب میاں محمد شہباز شریف نے کہا ہے کہ 2013 ءمیں جب مسلم لیگ (ن) کی حکومت بنی تھی تو موڈیز کی ریٹنگ منفی تھیں لیکن مسلم لیگ (ن) نے اپنی بہترین معاشی پالیسیوں سے موڈیز کی ریٹنگ کو مثبت کردیا تھا۔مسلم لیگ (ن) کے دورِ حکومت کے اکثریتی عرصہ میں یہ ریٹنگ مثبت رہی۔ تا ہم گزشتہ چند ماہ سے جاری عدم استحکام کی وجہ سے ریٹنگ دوبارہ منفی ہو گئی ہے جو افسوسناک ہے۔ تا ہم مجھے امید ہے کہ آئندہ انتخابات میں مسلم لیگ (ن) کی جیت کے بعد یہ ریٹنگ دوباری مثبت ہو جائے گی۔حالیہ دنوں میں ریٹنگ مثبت سے منفی ہونے کی واحد وجہ ملک میں جاری عدم استحکام ہے۔ کسی بھی قسم کا عدم استحکام معیشت کے لئے زہر قاتل ہے۔ شہباز شریف نے کہا کہ 25جولائی کے انتخابات میں مسلم لیگ (ن) کے مینڈیٹ کی تجدید کی روشنی میں پاکستان میں معاشی استحکام آئے گاجس سے سرمایہ کاروں کا اعتماد بحال ہو گااور تحریک انصاف کی دھرنا اور دیگر عدم استحکام پر مبنی پالیسیوں کو شکست ہو گی۔ پاکستان کے عوام شیر پر مہر لگا کر معاشی استحکام پر مہر لگائیں گے اور تحریک انصاف کی عدم استحکام پالیسیوں کو مسترد کر دیں گے۔ انہوں نے کہا کہ مسلم لیگ (ن) استحکام اور ترقی جبکہ پی ٹی آئی عدم استحکام اور انتشار کی علامت ہے۔قوم گواہ ہے کہ سی پیک کو روکنے کے لئے نیازی نے چینی صدر کے دورہ کو سبوتاڑ کیا تھا۔ مسلم لیگ ن کے صدر نے کہا کہ پاکستان مسلم لیگ (ن) کی حکومت میں ملک کی معاشی ترقی اور معاشی استحکام بہترین رہا ہے۔ اعدو و شمار گواہ ہیں کہ 2013ئ میں مسلم لیگ ن کے حکومت سنبھالنے کے بعد ملکی معاشی حالت میں نمایاں بہتری آئی اور ناصرف گزشتہ 10سال کی نسبت شرح نمو میں تیزی سے اضافہ ہوا بلکہ مہنگائی کی شرح بھی ملکی تاریخ میں کم سے کم رہی۔ انہوں نے کہا کہ مسلم لیگ (ن) کی حکومت سے قبل 2012 میں شرح نمو صرف 3.5فیصد تھا جبکہ 2017میں مسلم لیگ (ن) کے آخری ایام میں شرح نمو بڑھ کر 5.8 فیصد پر پہنچ گئی تھی۔ شہباز شریف نے کہا ہے کہ دی اکانومسٹ سمیت معاشی امور پر نظر رکھنے والے کئی عالمی اداروں کی رپورٹس میں بتایا گیا ہے کہ پاکستان کی معیشت مضبوط اور پائیدار دور سے گزر رہی ہے۔ مسلم لیگ (ن) نے بہترین پالیسیوں سے ناصرف بجلی کا بدترین بحران حل کیا بلکہ سی پیک کی شروع کرنے کے ساتھ ملک کے طول و عرض میں سینکڑوں میگا پروجیکٹس لگائے۔ بجلی کے ان منصوبوں نے نہ صرف ملک کو اندھیروں سے نکالا بلکہ معاشی ترقی کی روشنیوں سے بھی پاکستان کو منور کیا۔ شہباز شریف نے کہا کہ پاکستان کے عوام 25 جولائی کو ایک بار پھر مسلم لیگ ن کو بھاری اکثریت سے کامیاب کریں گے۔ میاں شہباز شریف نے کہا کہ ہمیں یہ یاد رکھنا ہو گا کہ 27جولائی کو میاں نواز شریف کو وزیراعظم کے عہدے سے ہٹانے کے فیصلے سے ناصرف سیاسی عدم استحکام پیدا ہوا بلکہ سرمایہ کاروں کے اعتماد کو بھی ٹھیس پہنچی۔لاہورسے خصوصی رپورٹرکے مطابق پاکستان مسلم لیگ (ن) کے صدر میاں محمد شہباز شریف نے کہا ہے کہ مسلم لیگ (ن) نے اپنے بہترین امیدوار میدان میں اتارے ہیں جنہوں نے بہترین کارکردگی کا مظاہرہ کیا ہے، جن کا ماضی بھی بے داغ ہے،جو پارٹی کے ساتھ مخلص ہیں اور جن میں جیتنے کی صلاحیت موجود ہے۔تمام امیدواران کو ٹکٹ حاصل کرنے کے لیے دو مراحل سے گزرنا پڑا،پہلا مرحلہ کارکردگی تھا جبکہ دوسرا امیدوار کا پس منظر تھا۔پہلا مرحلہ ضلع کا جائزہ لینے والی جبکہ دوسرے مرحلے کی.پارلیمانی جائزہ کمیٹی نے کی.۔انہوں نے اس بات کا عزم ظاہر کیا ہے کہ مظبوط اور پڑھے لکھے امیدواراس بات کو یقینی بنائیں گے کہ مسلم لیگ (ن) 25جولائی کو منعقد ہونے والے عام انتخابات میں اکثریت حاصل کرے گی۔

شہباز شریف