منی ہاکی سٹیڈیم میں آسٹروٹرف اور فلڈلائٹس کا افتتاح
لاہور( سپورٹس رپورٹر ) نشترپارک سپورٹس کمپلیکس کے منی ہاکی سٹیڈیم میں نئی آسٹروٹرف اور فلڈ لائٹس کا افتتاح کردیا گیا۔ سیکرٹری سپورٹس محمد عامر جان کا کہنا تھا کہ ہاکی کا کھویا ہوا وقار واپس دلانے کیلئے کام کر رہے ہیں، انشااللہ جلد اس میں کامیابی ملے گی۔ پیر کے روز منی ہاکی سٹیڈیم میں تقریب منعقد ہوئی جس کے مہمان خصوصی سیکرٹری سپورٹس پنجاب محمد عامر جان تھے جنہوں نے منی ہاکی سٹیڈیم میں نئی بچھائی گئی آسٹروٹرف اور فلڈ لائٹس کا افتتاح کیا۔ اس موقع پر ڈائریکٹر ایڈمن جاوید چوہان، ڈائریکٹر سپورٹس محمد حفیظ بھٹی، ہاکی اولمپئن توقیر ڈار، محمد انیس شیخ، سینئر کوچ شاہد نظامی اور دیگر بھی موجود تھے۔ افتتاحی تقریب میں توقیر ڈار ہاکی اکیڈمی اور رانا ظہیر ہاکی اکیڈمی کے مابین نمائشی میچ بھی کھیلا گیا جو ایک ایک گول سے برابر رہا ہے۔
