دورہ کینیڈا : ڈویلپمنٹ سکواڈ قومی ہاکی ٹیم کو ایک اور شکست
لاہور(سپورٹس رپورٹر) کینیڈا کا دورہ کرنے والی پاکستان ڈیویلپمنٹ سکواڈ ہاکی ٹیم کی شکستوں کا سلسلہ نہ رک سکا۔ میزبان کینیڈا نے تیسرے میچ میں پاکستانی ٹیم کو نو صفر سے ہرا دیا۔ پانچ میچوں کی سیریز میں میزبان کینیڈا ٹیم نے ناقابل شکست برتری حاصل کر لی ہے۔ اس سے قبل کھیلے جانے والے میچز میں کینیڈین ٹیم نے تین صفر کے مارجن سے کامیابی حاصل کی تھی جبکہ تیسرے میچ میں میزبان ٹیم نے آوٹ کلاس کھیل پیش کرتے ہوئے پاکستان ٹیم کو سنبھلنے کا موقع ہی نہیں دیا۔ ہاف ٹائم تک پاکستان ڈیویلپمنٹ سکواڈ کو پانچ گول کے خسارے کا سامنا تھا۔ جبکہ دوسرے ہاف میں میزبان ٹیم کی جانب سے مزید چار گول کر کے برتری کو نو صفر کر دیا۔ میچ کا خاتمہ اسی سکور پر ہوا۔ میچ میں پاکستان ٹیم کو چند پنلٹی کارنر بھی ملے تاہم قومی کھلاڑی اس سے فائدہ اٹھانے میں ناکام رہے۔
