لاہور(سپورٹس رپورٹر) سہ ملکی ٹی 20 سیریز کے پہلے میچ میں پاکستان نے زمبابوے کو 74 رنز سے شکست دیدی۔ ہرارے میں سہ ملکی ٹونٹی 20 سیریز کا پہلا میچ زمبابوے اور پاکستان کے درمیان کھیلا گیا، زمبابوے نے ٹاس جیت کر پاکستان کو پہلے بیٹنگ کی دعوت دی تو پاکستان نے مقررہ اوورز میں زمبابوے کو جیت کے لیے 183 رنز کا ہدف دیا جس کے جواب میں زمبابوے کی پوری ٹیم صرف 108 رنز پر ڈھیر ہوگئی۔زمبابوے کی جانب سے اننگز کا آغاز سلومن مائر اور شمو چبھابھا نے کیا تاہم اوپنرز کوئی خاص کارکردگی نہ دکھاسکے اور صرف ایک رن پر زمبابوے کی پہلی وکٹ گرگئی جس کے بعد کوئی بھی کھلاڑی پاکستانی بولنگ کے ا?گے زیادہ دیر تک کھڑا نہ رہ سکا اور صرف 88 کے اسکور پر 5 کھلاڑی پویلین واپس لوٹ گئے۔زمبابوے کی جانب سے تریسائی موساکانڈا نے مزاحمت کی اور 43 رنز کی اننگز کھیلی تاہم وہ 102 کے مجموعی اسکور پر آؤٹ ہوگئے، بعد میں آنے والے کھلاڑی زمبابوے کے سکور میں صرف 6 رنز کا ہی اضافہ کرسکے اور پوری ٹیم 17.5 اوورز میں 108 رنز بناسکی۔سات کھلاڑی ڈبل فگر میں داخل نہ ہوسکے ‘پاکستان کی جانب سے محمد نواز، عثمان خان، حسن علی اور محمد حفیظ نے 2،2 وکٹیں حاصل کیں۔اس سے قبل زمبابوے نے ٹاس جیت کر پاکستان کو پہلے بیٹنگ کی دعوت دی تو پاکستان کی جانب سے اننگز کا آغاز محمد حفیظ اور فخرزمان نے کیا تاہم صرف 13 کے مجموعی سکور پر حفیظ 7 رنز بناکرآؤٹ ہوگئے بعد میں آنے والے کھلاڑیوں میں حسین طلعت اور کپتان سرفراز خاص کارکردگی نہ دکھاسکے اور بالترتیب 10 اور 16 رنز بناکر آؤٹ ہوگئے۔اوپنر فخرزمان نے جارحانہ اننگز کھیلتے ہوئے نصف سنچری سکور کی تاہم وہ 61رنز بناکر آؤٹ ہوگئے۔ کپتان سرفراز کے آؤٹ ہونے کے بعد شعیب ملک اور آصف علی نے ٹیم کو سنبھالا، دونوں کھلاڑیوں نے جارحانہ کھیل کا مظاہرہ کیا اور 62 رنز کی شراکت قائم کی۔ شعیب ملک کے 37 اور آصف علی کے جارحانہ 41 رنز کی بدولت قومی ٹیم نے مقررہ اوورز میں 182 رنز بنائے۔چیسورو نے دو جبکہ کائیل جروس اور چی بھابھا نے ایک ایک وکٹ حاصل کی ۔ واضح رہے کہ زمبابوے میں کھیلی جارہی ٹونٹی 20 ٹرائنگولر سیریز میں پاکستان اور زمبابوے کے علاوہ آسٹریلیا بھی شامل ہے جبکہ ٹی 20 رینکنگ میں گرین شرٹس پہلے، آسٹریلیا تیسرے اور زمبابوے 12 نمبر پر موجود ہے۔دوسرا میچ آج پاکستان اور آسٹریلیا کے درمیان پاکستانی وقت کے مطابق دن ایک بجے کھیلا جائے گا۔ نگران وزیر اعلیٰ پنجاب ڈاکٹر حسن عسکری نے زمبابوے کیخلاف میچ جیتنے پر قومی ٹیم کو مبارکبا د دی ہے ۔ انہوںنے کارکردگی کا سہراتے ہوئے کہا کہ قومی ٹیم نے عزم ‘جذبے اور محنت سے کھیل کر زمبابوے کو شکست دی ہے ۔ کامیابی ٹیم ورک اور کھلاڑیوںکی محنت کا نتیجہ ہے ۔ حریف ٹیم کو ہر شعبے میں آئوٹ کلاس کیا ۔ امید ہے قومی ٹیم عمدہ کارکردگی کا مظاہرہ کرتے ہوئے سہ ملکی سیریز میںکامیابی حاصل کریگی ۔