اسلام آباد (نوائے وقت رپورٹ + آن لائن) عوامی مسلم لیگ کے سربراہ شیخ رشید نے کہا ہے کہ آنے والی اسمبلی میں میرا کردار اہم ہوگا۔ عمران خان کو وزیراعظم دیکھنا چاہتا ہوں۔ نجی ٹی وی سے گفتگو میں انہوں نے کہا کہ اگر پیپلز پارٹی سے سمجھوتہ کرنا پڑا تو بلاول میرا دوست ہے۔ پیپلز پارٹی پیسٹری چور اور ن لیگ بیکری چور ہے۔ علاوہ ازیں راولپنڈی زچہ بچہ ہسپتال کے حوالے سے سماعت ختم ہونے کے بعد سپریم کورٹ کے باہر میڈیا سے گفتگو کرتے ہوئے شیخ رشید احمد نے کہا کہ عوام پیپلز پارٹی یا دیگر جماعتوں کو ووٹ نہ دیں اور اپنے ووٹ کو ضائع نہ کریں جن کے حکمرانوں کو تھوڑی سی تکلیف ہو تو لندن چلے جاتے ہیں، ایک جماعت کا میڈیا سیل اداروں پر تنقید کررہا ہے۔ شیخ رشید احمد کا کہنا تھا کہ چیف جسٹس صاحب نے راولپنڈی کی عوام پر احسان عظیم کیا ہے اور اب لوگوں کی دعائیں جسٹس کے ساتھ ہیں۔