لاہور (کلچرل رپورٹر) سینئر اداکارہ بشریٰ انصاری نے کہا ہے کہ میں نے ہمیشہ پاکستانی فلم انڈسٹری کو سپورٹ کیا ہے اور پاکستانی فلمیں دیکھنے کے لئے سینما گھر بھی جاتی ہوں ۔ آج کل ہماری نئی بننے والی فلمیں کسی بھی طور پر بالی ووڈ کے معیار سے کم نہیں ، نوجوان رائٹرز اور ڈائریکٹرز کے آنے سے کراچی کی فلم انڈسٹری نے بڑا فروغ پایا ہے ۔میں نے ہمیشہ اپنی فلم انڈسٹری کو سپورٹ کیا ہے اور میں ساتھی اداکاروں سے بھی کہوں گی کہ وہ سنجیدگی کے ساتھ فلم انڈسٹری کے فروغ کے لئے اپنا کردار ادا کریں۔ یہ حقیقت ہے کہ اس وقت فلم انڈسٹری اپنی جدوجہد کے دور سے گزر رہی ہے جس میں ہماری بھرپور سپورٹ کی ضرورت ہے۔ ہمیں ہر پلیٹ فارم پر اپنی فلموں کی پروجیکشن کے لئے کام کرنے کی ضرورت ہے۔