لاہور + گوجرانوالہ+ سیالکوٹ (سٹاف رپورٹر+ نمائندہ خصوصی+ نامہ نگار) پولیس و قانون نافذ کرنے والے اداروں نے مختلف علاقوں میں رات گئے سرچ آپریشن کے دوران 19مشکوک افراد کو گرفتار کرلیا۔ پولیس نے مغلپورہ، مناواں، ہنجروال، ہربنس پورہ، راوی روڈ، وحدت روڈ، مسلم ٹائون و دگر مقامات پر سرچ آپریشن کیا اور گیسٹ ہائوسز، فیکٹریوں، ہوٹلز، سرائے پر بھی چیکنگ کی اور شہریوں کے بائیو میٹرک مشینوں سے کوائف چیک کئے۔ گوجرانوالہ سے نمائندہ خصوصی کے مطابق حساس اداروں اور پولیس نے مشترکہ سرچ آپریشن کے دوران 13افغانیوں سمیت 27ملزمان کو حراست میں لیکر انکے قبضے سے 7کلاشنکوف، سینکڑوں گولیاں اور دو موٹر سائیکلیں برآمد کرلیں۔ سیالکوٹ سے نامہ نگار کے مطابق مسلم کالونی میں سی ٹی ڈی اور پولیس کا چھاپہ، بھاری مقدار میں اسلحہ سمیت ایک درجن ملزمان کو گرفتار کر لیا۔ سی ٹی ڈی اور پولیس نے تھانہ مراد پور کے علاقہ مسلم کالونی میں مشترکہ کارروائی کرتے ہوئے علاقہ غیر سے آنے والے محمد حسین، سہیل خان ، خان زر ، لقمان خان، عاقل ڈار،علی عزت ، ملک بشیر، فیاض احمد اور محمد شہبازکو گرفتار کرکے پانچ سب مشین گنیں، چار میگزین اور پانچ سو سے زائد گولیاں برآمد کرکے مقدمہ درج کر لیا ہے۔