لاہور (سپورٹس ڈیسک ) کروشیا فٹ بال ٹیم کے کوچ زلاتکو ڈیلک نے کہا ہے کہ فٹ بال ورلڈ کپ کے سیمی فائنل میں انگلینڈ کا مقابلہ کرنے کیلئے تیار ہیں۔ہمارے کھلاڑی ابھی تازہ دم ہیں اور ان میں اتنی توانائیاں ہیں کہ وہ انگلش ٹیم کو شکست دے سکتے ہیں ۔ انہوں نے مزید کہا کہ یہ کوئی خوبصورت کھیل نہیں ‘سیمی فائنل مقابلہ ہے ‘یہ ایک لڑائی ہے ‘سیمی فائنل کی جنگ ہے اور ہم خو ش قسمت ہیں کہ سیمی فائنل کھیل رہے ہیں ۔ اب آگے رکنا نہیں چاہتے ‘ہم اپنی طرف سے بہترین کھیل کا مظاہرہ کریں گے ۔ میر ا اپنے کھلاڑیوں پر یقین ہے ‘وہ بہترین لڑائی لڑیں گے ‘اچھا کھیل پیش کریںگے ‘کوارٹر فائنل میں جذبات پر قابو نہیں رکھ سکا تھا جس کی وجہ سے آنکھوں سے آنسو چھلک پڑے تھے ۔ یہ خوشی کے ّآنسو تھے ۔ جیت کے بعد جو خوشی اور اطمینان ملا بیان نہیں کر سکتا ۔ سیمی فائنل میں پہنچنا کروشیا کیلئے بڑی کامیابی اور اچھا نتیجہ ہے ۔