لاہور (نامہ نگار) اقبال ٹائون میں بچوں کی لڑائی میں بڑے بھی کود پڑے اور ایک شخص کی فائرنگ سے محلے دار بی اے کا طالبعلم ہلاک جبکہ 3 افراد زخمی ہو گئے ہیں۔ تفصیلات کے مطابق اقبال ٹائون کے علاقہ مون مارکیٹ کے قریب گلی میں کرکٹ کھیلتے ہوئے بچوں کا آپس میںجھگڑا ہو گیا۔ بچوں کی لڑائی میں بڑے بھی کود پڑے۔ اس دوران بی اے کے طالبعلم24سالہ نوجوان منیب نے ان میں بیچ بچاؤ کرانے کی کوشش کی تو محلے دار عبداللہ نے اس کے ساتھ تلخ کی۔ جس کے بعد عبداللہ نے طیش میں آکر پسٹل نکال کر اندھا دھند فائرنگ کر دی۔ جس کی زد میں آ کر چار افراد منیب، بلال خواجہ، بلال نواب اور علی چودھری زخمی ہو گئے جبکہ ملزم موقع سے فرار ہو گیا ہے۔ ا طلاع ملنے پر پولیس اور امدادی ٹیموں نے موقع پر پہنچ کر زخمیوں کو طبی امداد کے لئے ہسپتال منتقل کردیا۔ جہاں طالبعلم منیب زخموں کی تاب نہ لاتے ہوئے دم توڑ گیا ہے۔ پولیس نے نعش قبضے میں لے کرپوسٹ مارٹم کے لئے مردہ خانے جمع کرا دی ہے اور مقتول کے والد طاہر کی مدعیت میں مقدمہ درج کرکے تفتیش شروع کر دی ہے۔