لاہور(خبر نگار) اس وقت صرف بلاول بھٹو شائستہ زبان استعمال کر رہے ہیں۔ مسلم لیگ ن آج بھی ڈیل کی کوشش کر رہے ہیں۔ اگر کوئی مخلوط حکومت بنی تو پیپلزپارٹی اس پر حاوی ہو گی۔ دھاندلی کی وجہ نیب نہیں بن رہی۔ انتخابات کی پچ میں گڑبڑ ضرور ہو رہی ہے۔ الیکشن کو خراب کرنے کی کوششوں سے اداروں کو اجتناب کر رہے ہیں۔ شہباز شریف ریلی سے تین گھنٹے تک غائب رہے۔ حمزہ شہباز اور مریم نواز کے درمیان پارٹی میں حدود کی جنگ نظر آتی ہے۔ ان خیالات کا اظہار رہنما پیپلزپارٹی اعتزاز احسن نے گذشتہ روز اپنی پریس کانفرنس میں کیا۔انہوں نے مزید کہا کہ بلاول بھٹوآج لاہور آئیں گے اور وہیں سے قصور کا راستہ اختیار کریں گے ۔بلاول بھٹو کے استقبال کے لیے مختلف مقامات پر کیمپس لگائے جائیں گے۔ بلاول قافلہ سے جناح ہسپتال اللہ ہو چوک پھر پیکو روڈ پرخطاب کریں گے۔ راستے میں موجود تمام پی پی پی کے کیمپس پر استقبال کیا جائے گا۔ تمام لوگوں سے گزارش ہے کہ کل سب پی پی پی کے جیالے اپنے لیڈر کا استقبال کریں۔ انہوں نے کہا کہ مسلم لیگ ن اور پی ٹی آئی اپنے انفرادی مقاصد کے لیے مذہب کا استعمال کر رہے ہیں۔ بلاول بھٹو وہ واحد سیاستدان ہیں جو منشور پر بات کر رہے ہیں۔ جتنے لوگ بلاول کے کیمپس میں آ رہے ہیں اتنے شہباز شریف لاہور سے نہیں نکال سکے۔ شہباز شریف نے اپنے بھائی کی پھیٹ میں چھرا گھونپا ہے۔ شہباز شریف ائرپورٹ جانا ہی نہیں چاہتے تھے۔ یہ چوری کھانے والے مجنوں اور شیر کی کھال میں بلے نکلے۔ مسلم لیگ ن کی کارکنوں اور ووٹروں کو کہوں گا کہ آپ کی قیادت میں جگرہ نہیں ہے۔