گوجرانوالہ، کامونکی‘ فیروزوالہ‘ ساہیوال (نمائندہ خصوصی+نامہ نگاران) مختلف واقعات میں شادی شدہ خاتون اور ذہنی مریض سمیت 4افراد نے خودکشی کرلی۔ کامونکی میں چاندنی چوک کے 25سالہ حبیب کاگھروالوں سے اکثر غربت کے باعث جھگڑا رہتا جس پر اْس نے دلبرداشتہ ہوکر گوجرانوالہ جاکر اپنے ماموں کی دْکان پر زہریلی گولیاں نگل لیں‘ متوفی دو بچیوں کا باپ تھا۔ گوجرانوالہ سے نمائندہ خصوصی کے مطابق ذہنی مریض نوجوان نے مبینہ طور پر سر میں فائر مار کر خودکشی کرلی۔ محلہ باغوالہ کا19سالہ مظہر ذہنی مریض تھا جس نے مبینہ طور پر اپنے سر میں گولی مار کر خودکشی کرلی۔ فیروزوالہ میں جی ٹی روڈ کی آبادی شامکے میں گھریلو حالات سے دلبرداشتہ ہوکر نوجوان فیصل عباس نے گندم میں رکھنے والی زہریلی گولیاں کھا کر خودکشی کرلی۔ ساہیوال میں مظہرعلی کی 26سالہ بیوی خاوند سے ناراض ہوگئی، خاوند نے ناراضگی پر سرزنش کی تو پروین نے زہر پی کر خودکشی کرلی۔