لاہور(سپورٹس رپورٹر+نمائندہ سپورٹس )انگلینڈ نے پاکستان کے خلاف سیریز کے لیے شیڈول کا اعلان کر دیاہے۔ شیڈول کے مطابق پاکستان اگلے برس ورلڈ کپ سے پہلے ایک ٹی 20 اور5ون ڈے میچز کھیلنے کیلئے انگلینڈ کا دورہ کرے گا۔انگلش کرکٹ بورڈ کی جانب سے جاری کیے گئے شیڈول کے مطابق پاکستان اور انگلینڈ کے درمیان ٹی ٹوئنٹی میچ 5 مئی کو کارڈف میں کھیلا جائے گا جس کے بعد دونوں ٹیموں کے درمیان ایک روزہ میچوں کی سیریز ہو گی۔5میچوں پر مشتمل سیریز کا پہلا ون ڈے 8 مئی کو اوول ، دوسرا 11 مئی کو ساوتھ ہمپٹن ، تیسرا 14 مئی کو برسٹل،چوتھا 17 مئی کو ناٹنگھم جبکہ پانچواں اور آخری میچ 19 مئی کو ہیڈنگلے میں کھیلا جائے گا۔ واضح رہے کہ پاکستان نے رواں سال مئی جون میں آئر لینڈ اور انگلینڈ کا دورہ کیا تھا، جس میں آئر لینڈ کے خلاف ایک ٹیسٹ جبکہ انگلش ٹیم کے ساتھ 2 ٹیسٹ میچز شامل تھے۔ گرین کیپس نے آئر لینڈ کے خلاف واحد میچ میں فتح حاصل کی تھی جبکہ انگلینڈ کےخلاف سیریز 1-1 سے برابر رہی تھی۔