لاہور(سپورٹس رپورٹر+نمائندہ سپورٹس) سنٹرل کنٹریکٹ کمیٹی نے نئے کنٹریکٹ کیلئے کھلاڑیوں کی فہرست تیار کرکے چیئرمین پی سی بی کو منظوری کیلئے بھجوادی۔ حسین طلعت اور آصف علی کو پہلی مرتبہ سینٹرل کنٹریکٹ میں شامل کیا گیا ہے ۔ ڈوپ ٹیسٹ مثبت آنے کے بعد اوپنر احمد شہزاد کانام فہرست سے نکال دیاگیا ہے جبکہ سینئربلے باز محمد حفیظ کی کیٹیگری میں ردوبدل کا معاملہ چیئرمین پی سی بی کی صوابدید پر چھوڑدیا گیا ہے۔ بابر اعظم کو پہلی مرتبہ اے کیٹیگری میں شامل کیاجائے اس کے علاوہ وہاب ریاض کو سی کیٹیگری میں شامل کرنے کی تجویزدی گئی ہے۔ چیئرمین پی سی بی نجم سیٹھی کو بھجوائی گئی فہرست میں سرفراز احمد، محمد عامر، یاسر شاہ ، شعیب ملک ، اظہر علی، بابر اعظم، محمد حفیظ،حسن علی ، اسد شفیق، وہاب ریاض ، سمیع اسلم ، شان مسعود ، فخر زمان ، جنید خان ، شاداب خان ،عثمان صلاح الدین، امام الحق، آصف علی ، حسین طلعت، شاہین شاہ آ فریدی ، صاحبزادہ فرحان، حارث سہیل، عثمان شنواری کے نام شامل ہیں۔ رومان رئیس اور عماد وسیم کی کنٹریکٹ میں شمولیت ان کی فٹنس رپورٹ سے مشروط کی گئی ہے۔ کمیٹی نے انڈر 19 ، پاکستان اے اور ڈومیسٹک کرکٹ میں عمدہ کارکردگی دکھانے والے پانچ کھلاڑیوں کوکنٹریکٹ میں شامل کرنے کی بھی تجویز دی ہے۔