لاہور (سٹاف رپورٹر+ نامہ نگار) لاہور میں نشتر کالونی کے علاقے میں زیرحراست ملزمہ نے مبینہ طور پر خودکشی کر لی۔ پولیس کا کہنا ہے کہ ملزمہ زیبا کے خلاف شوہر کامران کے اغوا کا مقدمہ درج تھا۔ ملزمہ اور اس کے ساتھیوں کو ریکوری کیلئے گھر لے جایا گیا تھا، ملزمہ نے گھر کی پہلی منزل سے چھلانگ لگا دی جس کے باعث زخمی ہو گئی۔ زخمی ملزمہ زیبا کو طبی امداد کیلئے ہسپتال پہنچایا گیا جہاں ملزمہ دم توڑ گئی۔ دریں اثنا شادباغ کی رہائشی 16سالہ لڑکی آسیہ نے گزشتہ روز سوتیلی ماں سے جھگڑے کے بعد کمرے میں جا کر اندر سے دروازہ بند کر لیا اور پنکھے سے رسی لٹکا کر اس سے گلے میں پھندا لے کر خودکشی کر لی۔ گھر والوں کے دروازہ کھٹکھٹانے پر بھی کوئی جواب موصول نہ ہوا جس پرگھر والوں نے کھڑکی سے اندر جھانکا تو آسیہ کی نعش پنکھے سے جھول رہی تھی۔