لاہور+ فیروزوالا (نامہ نگاران) باٹا پور کے علاقے میں تیز رفتار ٹریکٹر ٹرالی کی ٹکر سے مقتول بھائی کی فوتگی میں جانے والے موٹر سائیکل سوار بہن، بھائی موقع پر جاں بحق جبکہ ان کا باپ اور ایک بھائی شدید زخمی ہو گیا۔ بتایاجاتا ہے کہ احمد ٹاؤن لکھوڈیہر کا رہائشی مصطفی نامی شخص اپنے بھائی کے قتل کی اطلاع پر تین کمسن بچوں 4 سالہ بیٹی ماہم، 7سالہ عدیل اور 10 سالہ توحید کے ہمراہ موٹر سائیکل پر ایک فوتگی میں شرکت کے لئے تلواڑہ گاؤں جارہا تھا کہ باٹا پور کے علاقہ میں راوی سائفن کے قریب تیز رفتار ٹریکٹر ٹرالی نے انہیں ٹکر مار دی۔ جس سے 4سالہ ماہم اور 10 سالہ توحید موقع پر جاںبحق ہو گئے جبکہ ان کا باپ مصطفی اور سات سالہ بھائی شدید زخمی ہوگیا۔ اطلاع ملنے پر امدادی ٹیموں نے موقع پرپہنچ کر زخمی باپ ،بیٹے کو طبی امداد کے لئے ہسپتال منتقل کر دیا جبکہ دونوں کمسن بہن، بھائی کی نعشیں ضروری کارروائی کے بعد ورثاء کے حوالے کر دی گئی ہیں۔ دونوں بچوں اور ان کے قتل ہونے والے چچا ،ایک ہی خاندان کے تین افراد کی نمازِ جنازہ احمد ٹاؤن لکھوڈیہر میں ادا کردی گئی ہے۔ اس موقع پر ہر آنکھ اشکبار تھی۔