جہانیاں+مانسہرہ+ لاہور(آن لائن+صباح نیوز+ خصوصی رپورٹر) مسلم لیگ ن کے کارکنوں کی کار ٹائر برسٹ ہونے سے درخت سے جاٹکرائی،4نوجوان موقع پر جاں بحق، 2شدید زخمی ہوگئے،کارکی باڈی کاٹ کر نعشیں نکالی گئیں ۔تفصیلات کے مطابق جہانیاں کے علاقہ ٹھٹھہ صادق آبادسے کار میں سوار 6نوجوان جہانیاں میں مسلم لیگ ن کا آخری انتخابی جلسہ سننے آئے اور واپس جاتے ہوئے پیارہ پلی کے قریب ان کی کارکا ٹائر برسٹ ہو گیا جس سے ان کی کار بے قابو ہو کر ایک دھماکے کے ساتھ درخت سے جا ٹکرائی جس کے نتیجے میں ٹھٹھہ صادق آباد کے رہائشی 4نوجوان طارق سانگی،امجد سانگی،فہیم بھٹی اور رائو ثاقب موقع پر جاں بحق ہو گئے جبکہ ان کے دو ساتھی زخمی ہو گئے ۔اطلاع ملنے پر ریسکیو ٹیم موقع پر پہنچ گئی اور کار کی باڈی کاٹ کر نعشیں نکالیں جبکہ زخمیوں کو ہسپتال منتقل کر دیا گیا۔ ایک زخمی ناصر شاہ کی دونوں ٹانگیں ٹوٹ گئیں جس کی حالت تشویشناک بتائی جا تی ہے ۔حادثہ کے بعد جاں بحق نوجوانوں کے گھروں میں کہرام مچ گیا ‘ہر آنکھ اشکبار ہو گئی جبکہ علاقہ بھر میں سوگ کی کیفیت طاری ہو گئی۔ٹھٹھہ صادق آباد کے تمام بازار اور مارکیٹیں سوگ میں بند کر دی گئیں۔ دریں اثنا نگران وزیراعلیٰ پنجاب ڈاکٹر حسن عسکری نے جہانیاں کے قریب ٹریفک حادثے میں قیمتی انسانی جانوں کے ضیاع پر دکھ اور افسوس کا اظہار کیا ہے۔ انہوں نے جاں بحق افراد کے لواحقین سے دلی ہمدردی اور تعزیت کا اظہار کرتے ہوئے انتظامیہ سے رپورٹ طلب کرلی جبکہ زخمیوں کو علاج کی بہترین سہولتیں فراہم کرنے کی ہدایت کی۔مانسہرہ میں پی کے 34کے آزاد امیدوار کی گاڑی کو حادثہ پیش آیا ہے جس میں4 افراد زخمی ہو گئے ہیں۔تفصیلات کے مطابق مانسہرہ میں بانڈہ سم کے مقام پر پی کے 34کے آزاد امیدوار وقار الملک کی گاڑی کو حادثہ پیش آیا ہے۔ حادثے میں چار افراد زخمی ہو گئے ہیں جبکہ آزاد امیدوار وقار الملک شدید زخمی ہو گئے ہیں۔واقعے کے ریسکیو کے عملے نے جائے حادثہ پر پہنچ کر زخمی آزاد امیدوار وقار الملک کو طبی امداد کے لیے قریبی اسپتال منتقل کر دیا ہے۔