فیروز والا (نامہ نگار) پندرہ سالہ طالب علم اغوا کے بعد قتل نعش تشدد زدہ نالہ ڈیک سے ملی۔ فیروز والا پولیس نے نعش قبضہ میں لے کر پوسٹ مارٹم کے لئے بھیج دی ہے۔ بتایا گیاہے کہ جی ٹی روڈ کی آبادی لیبر کالونی (رانا ٹائون) کا رہائشی نویں جماعت کا طالب علم مدثر علی گزشتہ روز گھر سے اچانک لاپتہ ہوا جس کی تلاش کی گئی مگر سراغ نہ مل سکا۔ راہگیروں نے نوجوان کی نعش برساتی نالہ میں پڑی ہوئی دیکھ کر پولیس کو اطلاع دی۔ پولیس نے اس بارے میں اعلانات کروائے جس پر مقتول کی شناخت ہوگئی۔ پولیس نے بتایا کہ مقتول گزشتہ روز گھر سے باہر نکلا تھا جو واپس گھر نہ گیا جس پر ورثاء اپنی مدد آپ کے تحت ہی تلاش کرتے رہے لیکن کوئی پتہ نہ چل سکا۔ ورثاء اپنے لخت جگر کی نعش دیکھ کر دھاڑیں مار کر روتے رہے۔