لاہور(سپورٹس رپورٹر+نمائندہ سپورٹس) پی ایف ایف نیشنل انڈر 19 ویمنز فٹبال چیمپئن شپ کل سے لاہور میں شروع ہو گی۔ سٹی سکول گرائونڈ میں شیڈول ایونٹ میں چاروں صوبوں پنجاب، بلوچستان، سندھ، خیبرپی کے، ریجنز اسلام آباد، فاٹا، گلگت بلتستان کیساتھ کلبز ماڈل ٹائون، کراچی ککرز، ینگ رائزنگ سٹار راولپنڈی، ایبٹ آباد واریئرز، کراچی ویمنز کلب، سٹار کلب میرپور خاص اور ینگ رائزنگ سٹار لیہ کی ٹیمیں بھی شریک ہوں گی۔ پی ایف ایف کی جانب سے جاری کی گئی پریس ریلیز کے مطابق منیجرز میٹنگ اور ڈراز کی تقریب آج ہو گی جبکہ افتتاحی تقریب یکم اگست کو ہو گی،لیگ مرحلے کے میچ 6 اگست تک مکمل ہوجائیں گے، کوارٹر فائنلز 7 اور 8 اگست ہونگے، سیمی فائنلز میں 9 اور 10 اگست کو ٹیمیں برتری کی جنگ لڑیں گی، تیسری پوزیشن کا میچ 11 اگست کو ہوگا، ٹائٹل کی فاتح ٹیم کا فیصلہ 12 اگست کو کھیلے جانے والی فائنل میچ میں ہوگا۔ یاد رہے کہ قومی جونیئر ویمنز ٹیم کو اکتوبر میں ساف انڈر 18چیمپئن شپ اور نومبر میں اے ایف سی انڈر 19 ایونٹ میں شرکت کرنا ہے۔قومی انڈر 19 ویمنز فٹبال چیمپئن شپ کے دوران پی ایف ایف کے سلیکٹرز نیشنل کیمپ کیلئے 40 کھلاڑیوں کا انتخاب کریں گے،ان پلیئرز میں سے ہی مزکورہ بین الاقوامی ایونٹس میں شرکت کے لئے پاکستان کے قومی خواتین سکوارڈ کا انتخاب ہوگا۔ صدر پاکستان فٹبال فیڈریشن سید فیصل صالح حیات نے اپنے پیغام میں کہا ہے کہ پاکستان میں خواتین فٹبال کے فروغ کیلئے بھرپور اقدامات کئے جا رہے ہیں، نئے ٹیلنٹ کی تلاش کیلئے قومی سطح پر سال بھر کے دوران مختلف سرگرمیاں شیڈول کی گئی ہیں، تربیتی کیمپ میں منتخب پلیئرز کو ہرممکن بہترین سہولیات فراہم کی جائیں گی، امید کرتے ہیں کہ پاکستان ویمنز فٹبال ٹیم پہلے سے کہیں زیادہ تیزی کیساتھ ترقی کی منازل طے کرے گی۔