لاہور(سپورٹس رپورٹر+نمائندہ سپورٹس) قومی انڈر 19ویمنز فٹبال چیمپئن شپ میں ماڈل ٹاون اکیڈمی نے سٹار کلب میر پور خاص پر گولز کی برسات کردی، جویریہ نے 6 بار بال کو جال کی راہ دکھائی،کراچی ککرز نے کراچی کلب کو تین ایک سے ہرا دیا، گلگت بلتستان نے ایبٹ آباد واریئرز کوتین صفر سے زیر کیا، ینگ رائزنگ سٹار اور پنجاب کا میچ ایک ایک گول سے برابر رہا۔ تفصیلات کے مطابق قومی ایونٹ میں گزشتہ روز ماڈل ٹاون اکیڈمی نے یکطرفہ مقابلے میں سٹارکلب کو آوٹ کلاس کیا، جویریہ نے پہلے ہاف میں 3گول کرنے کے بعد دوسرے میں بھی اتنی ہی بار حریف کا دفاع پاش پاش کیا،دعاگل نے 3گول کئے، رامین فرید، ایمل خان، حبہ عرفان اور انوشکا رشید نے ایک ایک بار بال کو جال میں پھینکا۔ دوسرے میچ میں کراچی ککرز نے کراچی کلب کو تین ایک سے ہرا دیا، فاتح ٹیم کی جانب سے رابعہ نے ہیٹ ٹرک مکمل کی، کراچی کلب کا واحد گول فاطمہ نے کیا۔ گلگت بلتستان نے ایبٹ آباد واریئرز کو تین صفر سے زیر کیا، زارا احمد نے پہلے ہاف میں برتری دلائی، جس کو دوسرے ہاف میں زارا زیب نے دگنا کردیا،مسکان عالم کے آخری لمحات میں گول نے سکور تین صفر کردیا، ینگ رائزنگ سٹار اور پنجاب کا میچ ایک ایک گول سے برابر رہا، ینگ رائزنگ کی طرف سے پہلے ہاف میں ماحور نے گول کیا، مہرین گل نے شاندار انفرادی کوشش سے مقابلہ برابر کر دیا۔